मनोरञ्जन

भोजपुरी चलचित्र 'कयामत से कयामत तक'

विराटनगर, १५ जेठ । कथाकार, लेखक, निर्माता र नायकसमेत रहेका नेपाली युवा सलिम अन्सारीको लगानीमा निर्माण हुन लागेको भोजपुरी चलचित्र 'कयामत से कयामत तक' को छायाङ्कन आज विराटनगरमा सम्पन्न भएको छ । प्रेम कथामा आधारित पारिवारिक सो चलचित्रको सम्पूर्ण छायाङ्कन विराटनगरमा गरिएको नायक सलिम अन्सारीले आज पत्रकारहरूलाई जानकारी दिनुभयो । लगभग रु दुइ करोड लगानी भएको सो चलचित्रमा राजा मुराद, किरण कुमार, अलि खान, नायिका माधुरी मिश्रलगायतका कलाकार र प्राविधिक भारतीय रहेको बताइएको छ । बन्द र हडतालका कारण छायाङ्कनमा केही अप्ठयारो भए पनि २१ दिनमा छायाङ्कन सकिएको र चार महिनापछि चलचित्रलाई प्रदर्शनीमा ल्याउने नायक अन्सारीले बताउनुभयो । एघारवटा गीतमा उदितनारायण झा, कुमार सानुजस्ता गायकहरूको स्वर रहेको यो चलचित्रमा एकजना मात्र नेपाली कलाकार र अन्य सबै भारतीय छन् । रासस