काठमाडौँ, १७ असार । नेपाल नागरिक आवाजले नेपाली साहित्यका अथक साधक पूर्णप्रकाश नेपाल ‘यात्री’ को स्वास्थ्यलाभको कामना गर्दै पुस्तिका सार्वजनिक गरेको छ । राष्ट्रकवि माधव घिमिरेको प्रमुख आतिथ्यमा शनिबार उक्त पुस्तिका सार्वजनिक भएको हो ।नागरिक आवाजका संरक्षक डा. रणबहादुर रावल र पुस्तिकाका प्रधान सम्पादक एवम् प्रकाशक मधुसूदन पाण्डेयको विशेष पहलमा प्रकाशनमा आएको पुस्तिकाले सर्जकहरूलाई जीवित अवस्थामा नै सम्मान गर्नुपर्छ भन्ने प्रेरणा दिएको छ । बीस पृष्ठको उक्त पुस्तिकामा यात्रीको सङ्क्षिप्त परिचय, देशका वरिष्ठ राजनीतिक व्यक्तित्व एवम् सुप्रसिद्ध साहित्यकार, वरिष्ठ कवि तथा नागरिक समाजका अगुवाहरूको स्वास्थ्यलाभको कामना समावेश छन् । प्रकाशक नेपाल पिपुल्स भ्वाइस रहेको यो पुस्तिका विशेषतः स्रष्टा यात्रीको सुस्वास्थ्य र दीर्घजीवनको कामनामा केन्द्रित रहेको छ । कपन–१ फैकामा रहेको यात्री निवासमा उल्लेख्य कवि तथा साहित्यकारको उपस्थितिमा उक्त पुस्तिका विमोचन भएको थियो । पुस्तिकाका प्रमुख संरक्षक डा रावलको अध्यक्षतामा सम्पन्न विमोचन कार्यक्रमका वक्ताले पुस्तिका प्रकाशनको सराहना गरेका थिए । रासस