साहित्य

कलाको नयाँ प्रिन्ट मेकिङ प्रविधि

काठमाडौँ, १५असार । नेपाल ललितकला प्रज्ञा–प्रतिष्ठान चित्रकला विभाग र विन्दु, अ स्पेस फर आर्टिस्टको आयोजनामा प्रतिष्ठानमा आयोजना भएको प्रिन्ट मेकिङ (छापाचित्र) को पहिलो समूहको कार्यशाला आज समाप्त भएको छ । कार्यशालामा काठमाडौँ उपत्यका र उपत्यका बाहिरका ४५ कलाकारको सहभागिता भएको छ । आजदेखि दोस्रो समूहका पाँच दिन र तेस्रो समूहका पाँच दिन गरी यही असार २१ गते कार्यशाला सकिने छ । इचिङ पनि भनिने सो प्रविधिअन्तर्गत जिंक प्लेटमा ब्ल्याक जापान रङ पोतेर आफ्नो सिर्जना कोरिने र त्यसलाई एमोनी एसिडमा भिजाएर सुकाई उपयुक्त रङ राखेर अन्तिम रुप दिइन्छ । कार्यशालामा जापान सरकारले १५ वर्षअघि दिएको मेसिनको प्रयोग गरिएको छ । नेपालमा यो प्रविधि भर्खरजस्तो देखिए पनि पुरानै भएको र यसप्रति नवकलाकारको उत्साह देखिएको चित्रकला विभाग प्रमुख शान्तकुमार राईले बताउनुभयो । प्रतिष्ठानले यसअघि प्राज्ञ कर्णप्रसाद मास्केको संयोजकत्वमा हस्तकला प्रदर्शनी र प्राज्ञ शारदा चित्रकारको संयोजकत्वमा ‘वसन्त ’शीर्षकमा महिलाहरुको कला प्रदर्शनी सम्पन्न गरिसकेको छ भने राष्ट्रिय कला प्रदर्शनी शनिबार सकिँदैछ । रासस