साहित्य

समुन्नत समृद्ध नयाँ नेपालका लागि नयाँ पुस्तक

काठमाडौँ, ८ असार–

निर्माण व्यवसायी विष्णुप्रसाद शर्माले लेखेको ‘समुन्नत समृद्ध नयाँ नेपाल निर्माण गर्न कस्तो नियम बनाउनुपर्छ’ नामक पुस्तक नयाँ नेपाल बनाउनका लागि उपयोगी देखिएको छ । लेखक शर्माले देश र विदेशको यात्रामा रहँदा देखेजानेका र भोगेका अनुभवका अधारमा नेपाललाई समृद्ध बनाउन के कस्ता नीति नियमको व्यवस्था गर्नुपर्छ भन्ने वैचारिक चिन्तनले पुस्तकमा दिनुभएको छ ।

समृद्ध सभ्य समाजको परिकल्पनाबाट देश निर्माण गर्न नियम र योजना बनाउन समस्त नागरिक समाजका अगुवा, विद्वान्, नेता, उद्योगीलगायतको दृढ इच्छाशक्ति र दृष्टिकोणको आवश्यकता पर्ने र सबैले आआफ्ना कामकर्तव्य र जिम्मेवारी निर्वाह गर्नुपर्ने पुस्तकमा औँल्याइएको छ ।

पुस्तकमा नागरिकको अभिलेख गर्नुपर्ने, विद्युत् उत्पादनका लागि प्राथमिकता, युवा जनशक्तिलाई रोजगारी, विकेन्द्रीकरणका साथ सहरी विकास, आप्रवासी नागरिकलाई नागरिकता, कृषि तथा पशुपालनको विकास, जडिबुटी प्रशोधन र विकास, नेपाललाई ट्रान्जिट ट्रेड सेन्टर बनाइनुपर्ने, साझा अर्थतन्त्रबारेको सुझाव कृतिमा दिइएको छ ।

कृतिमा एनेकपा (माओवादी), नेपाली काँग्रेस, नेकपा(एमाले), मधेसवादी दल, राष्ट्रिय प्रजातन्त्र पार्टीलगायतका पार्टीले जनचाहननाअनुसारको कार्य गर्न नसक्दा जनतामा निराशा छाएको तथा राजसंस्थाले समग्र मुलुक र जनताको पीर मर्कालाई सम्बोधन गर्न नसक्दा त्यसकोे अवसान भएको विषयलाई पुस्तकमा उठाइएको छ ।

अर्घाखाँचीमा जन्मनुभएका लेखक लुम्बिनी बिल्डर्स प्रालिका प्रबन्ध निर्देशक र काठमाडौँ मोडेल कलेजका संस्थापक अध्यक्ष हुनुहन्छ । एकसठ्ठी वर्षीय उहाँ विदेशका केही देशका साथै नेपालका अधिकांश जिल्लामा पुगिसक्नुभएको छ । रासस