साहित्य

पुस्तक सङ्कलन गर्न डोको अभियान

म्याग्दी (बाबियाचौर), १ असार । ताकम गाविस–३ स्थित अन्नपूर्ण प्राथमिक विद्यालयले डोको अभियानमार्फत पुस्तक सङ्कलन गरेको छ ।

विद्यालयमा स्थापित पुस्तकालयलाई थप आधुनिक बनाउन तथा पुस्तकालयको पहुँच समुदायसम्म पु¥याउन घरघरमा गई पुस्तक सङ्कलन गरिएको विद्यालयका प्रधानाध्यापक टीकाराम सुवेदीले बताउनुभयो । पुस्तकालयमा रुम टु रिडले दुई हजार ५०० पुस्तक सहयोग गरेको छ ।

अभियानका क्रममा पुस्तकालय स्थापना भएपछि विद्यार्थीको शैक्षिक विकासमा समेत महत्वपूर्ण भूमिका खेलेको भन्दै गाउँलेले घरमा रहेका धार्मिक, साहित्यकलगायत विभिन्न विधाका पुस्तक सहयोग गरेका छन् । बिहीबार र शुक्रबार सञ्चालन गरिएको अभियानबाट ३५० पुस्तक सङ्कलन भएको पुस्तकालय व्यवस्थापन समितिले जनाएको छ ।

रुम टु रिड नेपालको आर्थिक सहयोग तथा गाजा युवा क्लबको व्यवस्थापनमा सन् २००८ देखि जिल्लाका विभिन्न ८० विद्यालयमा पुस्तकालय स्थापना भएका छन् । रासस