काठमाडौँ, १६ जेठ । गैरआवासीय नेपाली सङ्घले संविधानसभा विघटनबाट विकसित राजनीतिक अवस्थाप्रति सङ्घ अत्यन्त गम्भीर र चिन्तित भएको जनाएको छ । सङ्घले एक विज्ञप्ति प्रकाशित गरी प्रमुख दलहरूबीचको न्यूनतम सहमतिले मात्रै मुलुकमा देखिएको यो गम्भीर जटिलता हल हुने गरी अगाडि बढ्न र जनताको आकाङ्क्षा सम्बोधन गर्न सम्भव हुने भएकाले प्रमुख राजनीतिक दललाई राष्ट्रिय सहमति कायम गर्न र अन्य सबै पक्षलाई त्यसका लागि उचित वातावरण निर्माण गरिदिन अनुरोध गरेको छ । तोकिएको मितिमा संविधान जारी हुन नसकी संविधानसभा स्वतः भङ्ग हुँदा जनप्रतिनिधिहरूबाट संविधान बनाउने नेपाली जनताको २००७ सालदेखिको चाहनामा फेरि एकपल्ट ठेस लागेको विज्ञप्तिमा उल्लेख गरिएको छ । आ-आफ्ना मागमा सम्बन्धित निकायको ध्यानाकर्षा गराउने सर्न्दर्भमा केही दिनयता देशका विभिन्न ठाउँमा भएका घटनाहरूबाट शिक्षा लिई शान्त र पारस्परिक सद्भावको भावना कायम राखी समृद्ध नेपालको निर्माणमा हातेमालो गर्दै अगाडि बढ्न सम्पूर्ण नेपालीमाझ गैरआवासीय नेपाली सङ्घ हार्दिक अनुरोध गर्दछ, विज्ञप्तिमा भनिएको छ । रासस