मध्य नेपाल

विषालु च्याउ खाएका पाँचै जनाको मृत्यु

चितवन , ५ असार–

चितवनको कविलास गाविसमा विषालु च्याउ खाएर बिरामी परेका अर्का एकजनाको पनि गएराति मृत्यु भएको छ । योसँगै विषालु च्याउ खाएका एकै परिवारका पाँचैजनाको मृत्यु भएको छ । सोमबारसम्म चारजनाको ज्यान गएकामा आइसियुमा उपचाररत १३ वर्षीय अर्जुन चेपाङको गएराति ज्यान गएपछि विषालु च्याउ खाएका सबैको मृत्यु भएको हो ।

यसअघि सोमबार बिहान ३५ वर्षीय घरमूली बुद्धिबहादुर चेपाङको मृत्यु भएको थियो भने अघिल्लो दिन आइतबार उनकी श्रीमती ३० वर्षीया सोमती चेपाङ, उनका छोराहरु नौ वर्षीय मानबहादुर चेपाङ र ६ वर्षीय सन्तकुमार चेपाङको मृत्यु भएको थियो ।

चिकित्सक डा विजय पौडेलले उनीहरुको पाचनक्रियाका महत्वपूर्ण अङ्ग ड्यामेज भएकाले उपचार सफल हुन नसकेको बताउनुभयो । गत जेठ ३१ र ३२ गते जङ्गली च्याउ खाएर सिकिस्त बिरामी भएका एकै परिवारका पाँच चेपाङलाई जेठ ३२ गते दिउँसो स्थानीयले उपचारार्थ भरतपुर अस्पताल ल्याएका थिए । च्याउ खाएका उनीहरुलाई सुरुमा झाडाबान्ता र पेट दुख्ने भएको आफन्त धना प्रजाले बताउनुभयो ।

प्रिवारका पाँचैजनाको ज्यान गएपछि उनका घरमा रहेका दुई छोरा र वृद्धवृद्धा दम्पतीको बिजोग भएको छ । घरमा कमाउने खुवाउने सबैको ज्यान गएपछि बिरामी परेका वृद्धवृद्धामा रुवावासी चलेको छ । घरमा दुई वर्षका सोमलाल र एक काखेबालक छन् । उनीहरुको अहिले आफन्तले स्याहार गरिरहेका छन् । चितवनका विकट क्षेत्रका चेपाङ समुदाय जङ्गली गिठा, भ्याकुर, च्याउ आदि खोजेर खाने गर्दछन् ।

दुई वर्षअघि चिवतनको लोथरस्थित कान्दामा विषालु च्याउ खाँदा एकै परिवारका आठजनाको ज्यान गएको थियो । जङगलमा धेरै प्रकारका च्याउ फल्ने गरे पनि नचिनी खाँदा विषालु पर्ने गरेको चिकित्सकले बताएका छन् ।